Қазақстанда күрделі кендерден алтын алудың инновациялық технологиясы әзірленді

Қазақстандық ғалымдар байытуға қиын кендерден алтынды алу тиімділігін арттыруға және бір мезгілде шикізатты қайта өңдеу шығындарын азайтуға қабілетті жаңа технологияны ұсынды, деп хабарлайды Kazinform Өнеркәсіп және құрылыс министрлігіне сілтеме жасап.

Әзірлеме зертханалық сынақтардан сәтті өтіп, одан әрі өнеркәсіптік енгізу үшін перспективалы шешім ретінде қарастырылуда.

Әзірлеме заманауи алтын өндірудің негізгі сын-қатерлерінің біріне – бай кен орындарының сарқылуына және кедей, құрамы күрделі кендер үлесінің өсуіне жауап болды. Дәстүрлі қайта өңдеу әдістері металды жоғары деңгейде алуды әрдайым қамтамасыз ете бермейді және көбінесе қымбат реагенттерді және технологиялық режимдерді қатаң сақтауды талап етеді. Қазақстандық зерттеушілер бірден екі инновациялық технологиялық тәсілді – тотыққан және сульфидті алтын бар кендер үшін жеке-жеке ұсынды.

Тотыққан кендер үшін үйінді шаймалау алдында сутегі пероксидімен және/немесе натрий ацетатын қосу арқылы алдын ала өңдеу технологиясы әзірленді. Бұл алтынды алуды 7%-ға дейін, ал реагенттерді бірлесіп қолданғанда 10-14%-ға дейін арттыруға мүмкіндік берді. Сульфидті кендер үшін ғалымдар бай гравитациялық концентрат алу және оны кейіннен қарқынды цианидтеу әдісімен қайта өңдеу тәсілін енгізді. Натрий ацетатын пайдалану алтынды алуды қосымша 4%-ға дейін арттыруға және қайта өңдеу қалдықтарындағы асыл металдың мөлшерін азайтуға мүмкіндік берді. Сонымен қатар, натрий ацетаты қымбат реагенттердің перспективалы ішінара баламасы ретінде қарастырылады, бұл технологияны экономикалық тұрғыдан тиімдірек етеді.

Әзірлеушілердің айтуынша, технологиялық шешімдерді минералдық шикізаттың әртүрлі типтеріне бейімдеуге және отандық ресурстарды қайта өңдеу тереңдігін арттыруға мүмкіндік беретін кешенді тәсіл ерекше құнды. Жобаның жоғары ғылыми деңгейі халықаралық мойындаумен расталды.

Болашақта әзірлеушілер технологияны өнеркәсіптік апробациялау кезеңіне өтуді, сондай-ақ алтын кенді шикізаттың әртүрлі типтерін қайта өңдеу тиімділігін арттыру үшін жаңа реагенттік шешімдерді іздестіруді жалғастыруды жоспарлап отыр. Қазақстандық ғалымдардың әзірлемесі минералдық ресурстарды неғұрлым терең және экономикалық тиімді қайта өңдеуге, асыл металдарды алуды арттыруға және отандық тау-кен металлургия ғылымын дамытуға жаңа мүмкіндіктер ашады, деп атап өтті министрлікте.

Жоба «ҚР минералдық шикізатты кешенді қайта өңдеу жөніндегі ұлттық орталығы» РМК филиалы – «Қазмеханобр» өнеркәсіптік экология мемлекеттік ғылыми-өндірістік бірлестігінің мамандарымен, ғылыми жұмыс жөніндегі директордың орынбасары Бауыржан Сүрімбаевтың жетекшілігімен жүзеге асырылды.

Бұған дейін Қазақстанда ғылыми әзірлемелерді коммерцияландыру күшейтіліп жатқаны хабарланған болатын.

Дереккөз:inform.kz