Қазақстандық ғалымдар литий кендерін өңдеуде серпіліс жасады

Жаңа технология литийі аз кендерден литийді тиімдірек өндіруге мүмкіндік береді.

Қазақстандық ғалымдар құрамында литийі аз кендерді өңдеу тиімділігін айтарлықтай арттыруға мүмкіндік беретін инновациялық технология әзірледі. Жаңа шешім дәстүрлі технологиялармен салыстырғанда литий оксидінің мөлшері екі еседен астам жоғары концентрат алуды қамтамасыз етеді, сонымен бірге өндірістің қоршаған ортаға әсерін азайтып, елдің жоғары технологиялық салаларды дамытуға арналған шикізат базасын кеңейтеді, - деп хабарлайды inbusiness.kz ҚР Өнеркәсіп және құрылыс министрлігіне сілтеме жасап.

Әзірлемені Қазақстанның Минералдық шикізатты кешенді қайта өңдеу жөніндегі ұлттық орталығының ғалымдарының тобы ұсынды.

«Жаңа технологияның негізінде құрамында литийі аз алюмосиликатты кендерді кешенді өңдеуді қамтамасыз ететін карботермиялық балқыту процесі жатыр. Әдістің ерекшелігі - мақсатты металл литий мен кеннің алюмосиликатты құрамдас бөлігін іс жүзінде толық бөлуде», - деп түсіндірді зерттеу авторлары.

Литий концентратынан бөлек, технология металлургия өнеркәсібінде кеңінен қолданылатын ФС45 маркалы ферроқорытпаны алуға мүмкіндік береді.

Ғалымдар түсіндіргендей, арнайы таңдалған технологиялық параметрлердің арқасында литий қожда химиялық белсенді түрде шоғырланады. Бұл концентратты кейіннен өңдеуді және литийдің әртүрлі тұздарын алуды айтарлықтай жеңілдетеді.

Жоба жетекшісі, техника ғылымдарының кандидаты Феруза Бердіқұлованың айтуынша, жаңа әзірлеме қолданыстағы технологиялармен салыстырғанда литий концентрациясының айтарлықтай жоғары көрсеткіштеріне қол жеткізуге мүмкіндік береді.

«Құрамындағы литий мөлшері төмен кендерді өңдеу нәтижесінде біз құрамында 12–14% литий оксиді бар концентрат аламыз. Бұл өнімдегі литий оксидінің мөлшері дәстүрлі тәсілмен алынатын ұқсас өніммен салыстырғанда екі еседен астам жоғары. Қолданыстағы технологиялар бойынша бұл кезеңде литий оксидінің мөлшерін 5-6%-дан жоғары деңгейге жеткізу мүмкін емес», - деп атап өтті Феруза Бердіқұлова.

Әзірлеме авторлары жаңа технологияның бірқатар қосымша артықшылықтарын да атап өтеді.

«Атап айтқанда, ол күкірт қышқылының агрессивті ерітінділерін пайдалану көлемін айтарлықтай қысқартуға, қоршаған ортаға теріс әсерді азайтуға және өндірістік шығындарды төмендетуге мүмкіндік береді», - деді зерттеушілер.

Сонымен қатар, технологияны енгізу бұрын өнеркәсіптік өңдеу үшін перспективасы аз деп саналған литийі аз кен орындарын тиімдірек пайдалануға мүмкіндік береді.

Бүгінде литий ең сұранысқа ие аса маңызды металдардың қатарына жатады. Ол электромобильдерге арналған аккумуляторлар, энергияны сақтау жүйелері, ұялы электроника және басқа да жоғары технологиялық өнімдерді өндіруде кеңінен қолданылады. Әлемдік сұраныстың қарқынды өсуі аясында құрамында литийі бар шикізатты өңдеудің өзіндік технологияларын дамыту стратегиялық маңызға ие болып отыр. Қазақстандық ғалымдардың жаңа әзірлемесі аса маңызды металдар бойынша отандық шикізат базасын кеңейтуге, оларды өңдеу тиімділігін арттыруға және заманауи энергетика мен жоғары технологияларға арналған материалдардың перспективалық нарығында елдің позициясын нығайтуға қабілетті.

Дереккөз: inbusiness.kz