Талдау дәлдігі және заманауи технологиялар: Қазақстан мен Өзбекстан мамандары не туралы келісті

Қазақстандық ғалымдар Өзбекстанда минералды шикізатты зерттеудің озық әдістерін зерделеді

Заманауи геология мен металлургияны дамыту дәл зертханалық зерттеулерсіз және жаңа технологияларды енгізусіз мүмкін емес. Сондықтан халықаралық ынтымақтастық ғылыми жұмыстың сапасын арттырудың маңызды құралына айналуда. Қазақстан мен Өзбекстан мамандары кәсіби тәжірибе алмасып, минералды шикізатты талдаудың заманауи әдістерін, зерттеулердің дәлдігін қамтамасыз ету және озық зертханалық шешімдерді енгізу мәселелерін талқылады, деп хабарлайды inbusiness.kz ҚР Өнеркәсіп және құрылыс министрлігіне сілтеме жасап.

Халықаралық ынтымақтастық аясында Түсті металдардың Шығыс ғылыми-зерттеу тау-кен металлургия институтының (ВНИИцветмет) мамандары «Өзбекгеологиябарлау» АҚ Орталық зертханасына және Самарқандтағы Аналитикалық зертханалық кешеніне барып, өзбек әріптестері қолданатын ғылыми-техникалық тәсілдермен танысты.

«Кездесуге қатысушылардың назарында кендер мен оларды байыту өнімдерін сынау, зертханалардың біліктілікті тексеру бағдарламаларына қатысуы, зерттеулердің заманауи әдістемелерін қолдану, сондай-ақ аналитикалық бақылау саласында жаңа техникалық шешімдерді енгізу мәселелері болды», – деді Қазақстанның өнеркәсіп және құрылыс министрлігінде.

Сапар барысында қазақстандық мамандар минералды шикізатты зертханалық зерттеудің өз тәжірибесін ұсынып, сынаудың заманауи әдістемелерін әзірлеу және қолдану, стандартты үлгілерді пайдалану және ВНИИцветметтің Сынақ орталығы жағдайында аналитикалық нәтижелердің сенімділігін қамтамасыз ету туралы айтып берді.

Мамандар атап өткендей, кәсіби білім алмасудың мұндай түрі зертханалық зерттеулердің сапасын жетілдіруге, аналитикалық бақылаудың дәлдігін және тау-кен өндіру мен металлургия салалары кәсіпорындарының жұмыс тиімділігін арттыруға мүмкіндік береді.

«Заманауи зертхана үшін тек қажетті құрал-жабдықтар мен тәжірибенің болуы жеткіліксіз. Сонымен қатар өз жұмыс тәсілдерін халықаралық үздік тәжірибелермен үнемі салыстырып, ұштастырып отыру маңызды. Осындай кәсіби тәжірибе алмасу жаңа технологиялық шешімдерді білуге, ішкі үдерістерді жетілдіруге және сапа менеджменті жүйесін нығайтуға мүмкіндік береді», – деп атап өтті «ҚР минералдық шикізатты кешенді қайта өңдеу жөніндегі ұлттық орталығы» РМК «ВНИИцветмет» филиалының қолданбалы зерттеулер және сынақтар жөніндегі директорының орынбасары Лариса Кушакова.

ВНИИцветметтің Сынақ орталығы – геология, тау-кен ісі және металлургия салаларында сынау әдістемелерін жетілдірумен және енгізумен айналысатын мамандары бар заманауи аккредиттелген зертханалық база. Мұнда минералды шикізат пен өнеркәсіптік өнімнің сапасын бақылау, аналитикалық зерттеулердің дәлдігін тексеру, зертханалық жабдықты калибрлеу және әдістемелерді метрологиялық аттестаттау үшін қажетті стандартты үлгілер әзірленіп, аттестаттаудан өтеді.

Орталықта жасалған әзірлемелерді Қазақстан және жақын шетел елдерінің кәсіпорындары кеңінен пайдаланады. ВНИИцветметтің стандартты үлгілерін қолданатын ұйымдардың қатарында «Бақыршық тау-кен кәсіпорны» ЖШС, «Варваринское» АҚ, «ВостокХимЛаб» ЖШС, «Krisanalyt» ЖШС, «СЖС Казахстан ЛТД» ЖШС, «ЦентрЭКОпроект» ЖШС, сондай-ақ ресейлік «ИСО-Центррегионсервис» ЖШҚ және басқа да бірқатар кәсіпорындар бар.

Халықаралық кездесулер кәсіби тәжірибе алмасуға ғана емес, сонымен қатар зертханалық зерттеулерді жүргізудің бірыңғай тәсілдерін дамытуға, геологиялық-барлау жұмыстарын аналитикалық сүйемелдеу сапасын арттыруға және өнеркәсіпке заманауи технологияларды енгізуге ықпал етеді. Зерттеу сапасына қойылатын талаптар өсіп келе жатқан жағдайда, мұндай ынтымақтастық тау-кен металлургия саласын дамытудың және Қазақстан мен Өзбекстан арасындағы ғылыми-техникалық әріптестікті нығайтудың негізгі факторларының біріне айналады.

Дереккөз: inbusiness.kz